مــــا جـــــــاش رمضــــــــان
بقلمــــــــــــ الشاعــــــــــره
قــوت القلــــــــــــــــــــــوب
....................
وهونت عليك ...
تبيع كل اللي كان بنّا
وانا اللي كنت لك ضحكه
بتمسح دمعتك بشويش
وكنت باموت عشان خاطرك
وبافتحلك ...
ف قلب القلب ألف حياه
عشان إنت ياروحي تعيش
واشيل اللقمه من بُقّي
عشان تشبع
وكنت اشبع على شبعك
أتاري الغدر من طبعك
رمتني بطول دراعاتك
وخونت العيش
وانا قلبي اللي كان درويش
على بابك يقوم وينام
وكنت باعيش وباتوجّع
ولو شوفتك أخف قوام
وبعد دا كله هونت عليك
تبيعني ف زحمة الأيام
وانا المحشوره ف العذابات
بجرح أقوم
بدمعي أبات
وباعصر م الوجع شربات
يصبّرني على الأيام
واقول يمكن ظروف وخداك
وبُكره أكيد ح ترجعلي
مع دخلة هلال رمضان
أكيد قلبك ح يشفعلي
ومش ح يسيبني للأحزان
وجه رمضان ...
لقيتني ع الفطار قاعده
بدون نفسي
باصارع بالدموع يأسي
واصارع قلب ف غرامك
لقيته جبان
عشان بيقوللي رح ترجع
وإنّي مش ح اهون أبداً
وأنه ما جاش هنا رمضان
واديني ع الفطار قاعده
وعيني مشعلقه ع الباب
عشان تلمح نسيم ضلّك
بيدخل ..
وف إيديه رمضان
............................
ليست هناك تعليقات:
إرسال تعليق