مجتمــــــــــــع الأحذيــــــــــــة !!*******************نظرة فلسفيه..للاسطي/ سمير كعبواالاسطي سمير كعبوا .. اشهر اخصائي تصليح احذيه فى حيينا الشعبى ايام ماكانت الاحذيه كلها جلد طبيعي .اعتزل المهنه بعد هزيمته في معركة جلد الماعز الشهيره التى انتصر فيها شان سان سونج المحارب الصينى اول من استخدم الجلد الصناعي للاحذية !قابلت سلامه في عزاء بالحي بعد عشرين سنه غربه للاحذيه المصريه..خدني سلامه بحضن ورنيش لمع كل ذكرياتنا القديمه !فقد كان سلامه يقيم ندوات شعبيه لزبائنه اثناء تصليح الحذاء يحكي فيها عن فلسفته في الحياه...جلسنا بعد العزاء في مقهى شعبى :ـ سلامات يااسطي فينك المده دى كلهاـ عايش بشوف البشر وبتفرج ع الدنيا.. شوفت الناس قاعده ازاى في العزاء يا استاذ؟ـ مش واخد بالي يا اسطي ..ازاى ؟ـ مرصوصين زى الجزم اللى في فاترينة محل الاحذيه ؟ـ حرام عليك ياسولم ايه التشبيه الارضى ده؟ـ دى الحقيقه يا استاذ!!! عارف اللي جمعهم ايه ؟ـ ايه يااسطي ؟ـ اسم المحل بس !!!مش فاهم ؟ـ هفهمك ... معظم الاسر المصريه دلوقت كلها بقت زى الجزم لا مؤاخذه اللي مرصوصه في محل الاحذيه اللي بيربطهم ببعض هو اسم المحل بس!! قصدى اسم العيله .. ... لكن كل واحد في وادى ... يعنى تلاقي محل او عائلة السنباطي ..ولا البغل ..ولا السايس ..ولا سلامه ..ولا مبارك ..ايا كان اسم العيله هو نفسه اسم محل الاحذيه بس جوه المحل تلاقي بشر متفرقين.واحد شكله شكل الجزمه ام بوز!!واحد شكل الجزمه الكشف..وواحد شكل الجزمه اللي برباط ..واللي شكل الجزمه الصيفي مخرم ..واللي بكعب واللي من غير ..حتى في لون الوشوش تلاقي ده اسود وده اصفر وده ابيض وده مالوش لون ..وده بلونين !!بس لما يحصل حالة وفاة كله يتجمع ويترص في الشادر بنفس شكل رصة الجزم اللي في المحل كلها تحت اسم المحل او العيله بس مالهمش علاقه ببعض!ـ ياخبر اسود علي ده تشبيهه يا اسطي ..بتجيب الكلام ده منين؟ـ من الواقع الاسود بتاعتنا يا استاذـ طيب والحل ايه في مجتمع الاحذيه ده ؟ـ قبل م اقولك ع الحل هقولك علي حكاية حصلت زمانـ قولـ فاكر ايام حرب اليمن ..لما دخلت علينا موضة الشبشب البلاسيتيك بتاع الحمام اللي اسمه زنوبه او خدوجهـ ايوه فاكر يا اسطي ماله الشبشب دهـ كان كل جوز من الشبابشب دى مربوط بفتله رفيعه بيجمع الجوز حسب المقاس والنوع والشكل .وكل الازواج البلاستيك دى الراجل كان بيربطهم في حبل تخين او سيخ حديد متني يجمعهم كلهم مع بعض في ربطة واحده ..كان زمان الناس كده... وبعدين دخل بعض المشايخ وافتوا بان اسم الشبشب حرام لانه ليه رمزيه بعيده شويه دينيه يعنى زنوبه وخدوجه ..!راح الراجل البياع بتاع الشباشب خاف من التهمه خلع السيخ الحديد وقطع الحبل التخين اللي كان لامم كل الشباشب دى وخلي كل جوز لوحده برباط فتله ضعيف!!ـ ايوه حصل يا اسطي وبعدينـ وبعدين بقي جه واحد تاني رئيس قطع الفتله الضعيفه بين كل زوج والتاني خلا الشباشب تتباع فرداني ..عمل انفتاح .. بس هو ف الحقيقه كان انفشاخ بقي كل شبشب يخش الحمام اللي يعجبه ..وسمع كلام الشيخ بقي واتلخبطت الشباشب كله دخل علي كله.. الحريمى علي الرجالي ع الاطفال حتى فيه ناس كانت بتلبس الشبشب بتاع الحمام وتمشى بيه في الشارع وتتفسح بيه وهي لابسه القفطان ..واعتبروا ان الجزم حرام ...مع انهم هما هما اللي قالوا اسم الشبشب حرام ..والناس صدقت وبقي البشر زى الشباشب والجزم كل واحد مع نفسه بس اللي بيجمعهم اسم المحل او اسم العيله!!!!ـ طيب ماشى والحل ايه بقي .؟ـ هقولك ع الحل لما تعرف مين الشيخ اللي فك السلك وقطع الرباط الحديد..ومين الرئيس اللي قطع ااخر فتله في الشبشب وخلي الجزم بالشكل ده ..قصدى خلي البشر بالشكل ده!!!!بص يا استاذ الحل نرجع للجلد الطبيعي ... جلدك وجلد الناس .بعض الناس بقت زى الاحذيه للاسف ..وبقي جلدها مالوش لون ولا تعرف اصله !!وعلى رأى صديقى الررائع الراحل / سيد حجاب :فيه جلد مالهوش لونوجلد بألف لونلو تغسله بصابونيطلع لونه اونطهفيه جلد كان جملوجلد كـــــــان حملواهو كله بيتعملجزمه وحزام وشنطه !عادل حراز
ليست هناك تعليقات:
إرسال تعليق